Góð ráð fyrir lesblinda starfsmenn

Endilega deildu okkur

Afar gott getur verið að setjast niður með yfirmanni og greina áhrif lesblindunnar og hvað sé hægt að bæta í vinnuumhverfinu svo þínir hæfileikar nýtist. Í því samhengi er gott að byrja á því að skoða eigin styrkleika og veikleika.

Þú getur t.d. spurt þig eftirfarandi:

Hvaða áhrif hefur lesblindan á mig í vinnunni?
Hvaða verkefni eru það sem lesblindan hefur mest áhrif á?
Er það að skrifa tölvupóst?
Taka niður skilaboð í símtali?
Lesa leiðbeiningar?
Skipuleggja daginn?

Lestur og skrif

Hægt er að auka vinnugetu með texta með því að tileinka sér nokkur grunnatriði. Yfir nokkur þeirra er farið hér að neðan.

Þurfir þú að skrifa langan texta, skiptu þá efninu í hluta því þannig vinnst verkið betur.
Veldu tíma þegar þú veist að þú verður fyrir minnstu áreiti.
Skráðu niður orð sem þú veist að þú átt erfitt með að stafsetja þannig að þú getir flett þeim upp síðar.
Notaðu stuttar setningar, einbeittu þér að aðalatriðum.
Lestu textann og greindu aðalatriðin.
Hafðu ekki áhyggjur af stafsetningu fyrr en þú hefur lokið við að skrifa.
Breyttu leturgerð, stærð eða bakgrunnslit.
Renndu yfir textann og skoðaðu myndir og töflur vel.
Prentaðu á litaðan pappír eða litaðar glærur.
Nýttu þér leiðréttingahugbúnað.
Nýttu vafra sem lesa yfir á íslensku.
Búðu til sniðmát fyrir tölvupósta, reikninga, fundarbókanir, pantanir o.fl.
Láttu talgervil alltaf lesa textann jafnóðum sem og í lokin svo þú heyrir hvernig hann hljómar.

Minni

Minnisörðugleikar eru vandamál sem sumir lesblindir þekkja vel og geta tengst oft nöfnum, dagsetningum og staðreyndum. Kvíði og streita geta aukið á vandann. Margir lesblindir hafa gott sjónminni og muna því betur ef upplýsingar eru myndrænar á meðan aðrir muna betur það sem er sagt er. Því er mikilvægt að þú áttir þig á hvort þér henti betur að sjá eða hlusta.

Hafðu eftirfarandi í huga þegar kemur að skráningu upplýsinga.

Afar gott er að nýta tengiliði og dagbækur í tölvu eða farsíma til að muna nöfn, tímasetningar og fleira.
Notaðu upptökutæki eða síma til að taka upp námskeið eða mikilvæga fundi.
Nýttu myndavélina þína til þess að taka myndir af mikilvægu efni á fundatöflunni.

Skipulagning og tímastjórnun

Að skipuleggja daginn sparar þér tíma. Að takast á við lesblindu á vinnustað hefur oft í för með sér að þú þarft að eyða meiri tíma í suma hluti en aðrir. Því er mikilvægt að verða leikinn í að forgangsraða verkefnum.

Búðu til lista. Skrifaðu niður það sem þarf að gerast í dag. Farðu yfir það mikilvægasta og merktu það sérstaklega.
Farðu yfir listann tvisvar á dag. Lítir þú ekki á listann reglulega kemur hann að engu gagni.
Endaðu daginn á að færa það sem ekki kláraðist á lista morgundagsins.
Notaðu dagbók fyrir alla fundi, nýttu hana líka til að setja inn skilafresti verkefna.
Nýttu dagbókina fyrir alla mikilvæga atburði í lífi þínu eins og afmælisdaga
Sumum finnst gott að nota minnismiða sem hengja má framan á tölvuna eða á vegg við hlið hennar með atriðum sem muna þarf.
Reyndu að raða skjölunum þínum þannig að þú eigir auðvelt með að finna þau. Hægt er flokka gögn í nokkra bakka: það sem á að gerast í dag, þarf að gerast bráðum eða geyma.

Endilega hafðu samband við okkur hjá félaginu hafir þú spurningar eða viljir leita ráða.